Сборник - Типикон

• Название: Типикон
• Автор: Сборник
• Жанр: Религия

Типикон, в православной литургике — книга, содержащая главным образом устав богослужения. В Типиконе находится также месяцеслов с Марковыми главами, соединяющими подвижный и неподвижный годовые богослужебные круги; правила о постах; правила монастырского общежития и указания о совершении храмовых праздников; трапезе и других сторонах церковной и монастырской жизни.

Типикон, сиречь, изображение церковнаго последования во Иерусалиме Святыя Лавры, преподобнаго и богоноснаго отца нашего Саввы. Тожде последование бывает и в прочих во Иерусалиме честных обителех: подобне и в прочих святых Божиих церквах.

---

[Смотри] Известно же буди всем о святей воде, яко нецыи суть отлучающе себе от святыя воды вкушения ради, не добре творят: ибо благодати ради божия дана бысть на освящение миру, и всей твари. темже во всяких местех и скаредных, и всюду кропится, яже и под ногами нашими суть: и где есть сих разум, еже не пити сея? но да увеси, яко не вкушения ради ястия нечистота в нас есть, но от скверных дел наших, очищени же от сих, пием без сомнения сию святую воду. О сей воде небесная она словесная ластовица, златословесный вселенский учитель иоанн, Константиня града патриарх в слове своем, о еже сходитися христианом во святую божию церковь, и о крещении: егоже начало: Вси вы в благодушии есте днесь, аз же в печали един болезную: Свидетельствует глаголя, но убо чесо ради не день воньже родися, но день воньже крестися, явление глаголется? сей бо есть день воньже крестися, и водное освяти естество. Сего ради и в полунощи на праздник сей, вси почерпше в домы воду относят и соблюдают, и лето совершенно хранят, понеже днесь освящаются воды: и знамение бывает явственное, не растлевающуся вод оных естеству долготою времене: но лето совершенно, и два и три множицею, днесь черпаемая вода цела и нова пребывает: и по толицем времени, ныне о источника взятой воде сравняется.

[Смотри] Подобает ведати: яко аще случится навечерие святаго богоявления в субботу, или неделю, пост не бывает. Литургиа же бывает златоустаго во свое время по обычаю, якоже и всегда. И по отпущении литургии в трапезу не ходим, но в притворе церковнем седшим нам, трапезарь дает по уломку хлеба коемуждо: или по малу хлебу пшеничному, и мало смоквий и финик, и по единой чаше вина, яко да не наречется пост: ожидаем же вечерняго собора. Посем отшедше в келлии своя, безмолвствуем до времене вечерняго. Великаго же василиа литургиа совершается в самый праздник. Вместо же достойна, поем ирмос 9–й песни праздника.

[Смотри] При часе же вечернем дне: Знаменует в великое, и потом во вся тяжкая, и собравшимся нам во храм: И благословившу иерею, поем вечерню по обычаю: псалом, благослови душе моя Господа: И аще в субботу вечера, поем, блажен муж, кафисму всю. Аще ли в неделю вечера, поем 1–й антифон. На Господи воззвах, поем стихиры праздника на 8, глас 2: Просветителя нашего: Слава, и ныне, глас тойже: Приклонил еси главу предтечи: Таже вход со евангелием. Свете тихий: Прокимен дне: и чтения по чину их с тропари и со стихи и Трисвятое же не поем, занеже не совершается божественная литургиа. По чтении же паремий, ектениа малая: и по возгласе, Прокимен, апостол, и евангелие, яко предписася. ектениа, Рцем вси: И Сподоби Господи: И Исполним вечернюю молитву: иерей возглас. И исходим ко крестильнице, идеже уготован стол. И действует настоятель, или иерей по чину, якоже указася прежде, Поюще тропари: Глас господень на водах: И прочее бывает воследование освящения воды, неизменно. По кроплении же освященныя воды входим во храм, и поем стихиру: Слава, и ныне, глас 6: Воспоим вернии: и отпуст. Потом тропарь праздника. Слава, и ныне, кондак: явился еси днесь: И пивше священную воду, входим в трапезу, и ядим совершенно, с древяномаслием, и пием вино.

При часе же 10–м нощи ударяет в великое, и потом во вся капманы.

И собравшимся во храм, благословившу иерею, поем повечерие великое: и С нами бог, с пением, на глас 8. По 1–м трисвятом,

Тропарь праздника, глас 1: Во иордане крещающуся тебе Господи, троическое явися поклонение: родителев бо глас свидетельствоваше тебе, возлюбленнаго тя сына именуя, и дух в виде голубине извествоваше словесе утверждение. явлейся Христе Боже, и мир просвещей, слава тебе.

По 2–м трисвятом, кондак праздника, явился еси днесь: По Слава в вышних: по обычаю исходим в притвор, поющим нам стихиры праздника, глас 4: одеваяйся светом яко ризою: Слава, глас 8: Господи исполнити хотя: И ныне, глас тойже: Днесь тварь просвещается: Таже молитвы обычныя. И вшедше во храм, поем стиховну праздника: стихиры самогласны, глас 2: На иорданстей реце: с припевы праздничными. 1–й, Море виде, и побеже: 2–й, Что ти есть море, яко побегло еси? Припеваем же сими стихи, и до отдания праздника. Слава, и ныне, глас 6: еже от девы солнце: Тропарь, глас 1: Во иордане крещающуся тебе Господи: трижды. И благословение хлебов по обычаю. Буди имя господне: псалом 33: благословлю Господа: и предложится чтение праздника: и по чтении, и по шестопсалмии, на Бог Господь тропарь праздника трижды, и обычныя стихологии. По 1–й стихологии седален праздника, глас 3. Подобен: Красоте: явльшуся тебе во иордане спасе: Слава, и ныне, глас 4. Подобен: Скоро предвари: Струи освятил еси иорданския: И чтем во евангелии толковом, еже от матфеа. По 2–й стихологии седален праздника, глас 5. Подобен: Собезначальное слово: иорданскими струями обложся: Слава, и ныне, глас 4. Подобен: удивися иосиф: иордане реко: И чтем во евангелии толковом, еже от матфеа: по чтении же даются свещи братиям. По полиелеи седален праздника, глас 4. Подобен: удивися иосиф: Приидите увидим вернии: Слава, и ныне, тойже. И чтение. Степенна, 1 антифон 4–го гласа. Прокимен праздника, глас 4: Море виде и побеже, иордан возвратися вспять. Стих: Что ти есть море, яко побегло еси? Всякое дыхание: Стих: Хвалите бога во святых его: евангелие марка, зачало 2: Прииде Иисус о назарета: По 50–м псалме, Слава: Всяческая днесь: И ныне, тойже. Таже, Помилуй мя Боже: и стихира, глас 6: Бог слово явися: Канона два, праздника: кир космы, и кир Иоанна: ирмосы обою канонов, по дважды. Тропари на 12: последи ирмосы обою канонов, кийждо лик свой ирмос. По 3–й песни, впакои, глас 5: егда явлением твоим: И чтение. По 6–й песни,

Кондак праздника, глас 4: явился еси днесь вселенней, и свет твой Господи знаменася на нас, в разуме поющих тя: пришел еси, и явился еси, свет неприступный.

На 9–й песни паки вжигают свещи братия. честнейшую не поем, но поем припевы праздника: якоже изъявися декемвриа в 25 день. Светилен праздника: явися спас благодать и истина: трижды. На хвалитех стихиры праздника, самогласны, глас 1, на 4: Свет от света возсия: Слава, глас 6: Водами иорданскими: И ныне, глас 2: Днесь Христос на иордан прииде: Славословие великое. По трисвятом тропарь праздника. ектении и отпуст. И дается святый елей от кандила, поющим нам стихиру праздника, таже час 1–й. На 1–м часе тропарь праздника. По трисвятом кондак праздника, и прочее, и совершенный отпуст. В сей день литургиа бывает порану, труда ради бденнаго.

На Литургии антифон 1, псалом 113, глас 1: Во исходе израилеве от египта, дому иаковля, из людей варвар. молитвами Богородицы, спасе спаси нас. И другий лик, Стих 2: Бысть иудеа святыня его, израиль область его. молитвами Богородицы: Стих 3: Море виде и побеже, иордан возвратися вспять. молитвами Богородицы: Стих 4: Что ти есть море, яко побегло еси? и тебе иордане, яко возвратился еси вспять? молитвами Богородицы: Слава, и ныне: молитвами Богородицы: Антифон 2, псалом 114, глас 2: Возлюбих, яко услышит Господь глас моления моего. спаси ны сыне Божий, во иордане крестивыйся, поющия ти: аллилуиа. Стих 2: яко приклони ухо свое мне, и во дни моя призову. спаси ны сыне Божий: Стих 3: объяша мя болезни смертныя, беды адовы обретоша мя: скорбь и болезнь обретох, и имя господне призвах. спаси ны сыне Божий: Стих 4: милостив Господь и праведн, и Бог наш милует. спаси ны сыне Божий: Слава, и ныне: единородный сыне: Антифон 3, псалом 116, глас 1: Исповедайтеся господеви, яко благ, яко в век милость его. Тропарь, Во иордане крещающуся: Стих 2: Да речет убо дом израилев, яко благ, яко в век милость его. Во иордане крещающуся: Стих 3: Да речет убо дом ааронь: яко благ, яко в век милость его. Во иордане крещающуся: Стих 4: Да рекут убо вси боящиися Господа: яко благ, яко в век милость его. Во иордане крещающуся: Входное: благословен грядый во имя господне, благословихом вы из дому господня, Бог Господь и явися нам. Тропарь: Во иордане крещающуся тебе Господи: Слава, и ныне, кондак, глас 4: явился еси днесь вселенней: Вместо трисвятаго, поем: елицы во Христа крестистеся: Прокимен, глас 4: благословен грядый во имя господне, Бог господь, и явися нам. Стих: Исповедайтеся господеви, яко благ, яко в век милость его. Апостол к титу, зачало 302: Чадо тите, явися благодать божия: Аллилуиа, глас 4: Принесите господеви сынове божии: Стих: Глас господень на водах: евангелие матфеа, зачало 6: Прииде Иисус от галилеи: Причастен: явися благодать божия спасительная всем человеком. Аллилуиа, трижды. На трапезе бывает утешение братии велие. ядим рыбу, и сыр, и яица, и пием вино: Мирстии же мясо, аще будет и в среду, или пяток. И чтется слово златоустаго, емуже начало: Вси вы благодушнии:

7. (:. Собор святаго славнаго пророка, предтечи и крестителя Иоанна.

Вечер, стихологиа не бывает бдения ради бывшаго, кроме субботы. На Господи воззвах стихиры праздника 3, глас 2: Просветителя нашего: И предтечи 3, глас 1. Подобен: Всехвальнии мученцы: Видев тя грядуща Христе: Слава, глас 6: Во плоти светильниче: И ныне, праздника, глас тойже: Бог слово явися плотию: Вход. Прокимен великий, глас 6: Бог наш на небеси и на земли, вся елика восхоте сотвори. Стих: Во исходе израилеве от египта: Стих: Море виде и побеже: Стих: Что ти есть море, яко побегло еси? И паки, Бог наш: Аще случится в субботу вечера, глаголем прокимен: Господь воцарися: Таже ектениа, и Сподоби Господи: и Исполним вечернюю молитву: На стиховне стихиры праздника, глас 4. Подобен: Дал еси знамение: с припевы их, и до отдания, вечер и утро. Слава, предтечи, глас 4: яко духа рачитель: И ныне, праздника, глас тойже: Приидите подражаим мудрыя девы: Тропарь, глас 2: Память праведнаго с похвалами, тебе же довлеет свидетельство господне предтече: показал бо ся еси воистину и пророков честнейший, яко и в струях крестити сподобился еси проповеданнаго. темже за истину пострадав радуяся, благовестил еси и сущим во аде бога явльшагося плотию, вземлющаго грех мира, и подающаго нам велию милость.