Сборник - Типикон

• Название: Типикон
• Автор: Сборник
• Жанр: Религия

Типикон, в православной литургике — книга, содержащая главным образом устав богослужения. В Типиконе находится также месяцеслов с Марковыми главами, соединяющими подвижный и неподвижный годовые богослужебные круги; правила о постах; правила монастырского общежития и указания о совершении храмовых праздников; трапезе и других сторонах церковной и монастырской жизни.

Типикон, сиречь, изображение церковнаго последования во Иерусалиме Святыя Лавры, преподобнаго и богоноснаго отца нашего Саввы. Тожде последование бывает и в прочих во Иерусалиме честных обителех: подобне и в прочих святых Божиих церквах.

---

14. (+) Всемирное воздвижение честнаго и животворящаго креста: И успение во святых отца нашего Иоанна, архиепископа Константина града, златоустаго.

[Смотри] Ведомо же буди, яко златоустаго воследование в сей пресветлый день, в Константине граде, и повсюду не поется, воздвижения ради честнаго креста, господьскаго праздника: и преложися в 13 день ноемвриа месяца.

Во время же вечера, кандиловжигатель, по благословению ударяет в кампан. иерей же входит в сосудохранительницу, и полагает честный крест, со благовонными васильки на жертвенник, на мисе, и поем, На малей вечерни, на Господи воззвах, стихиры праздника на 4, глас 1. Подобен: небесных чинов: крест возносится: Слава, и ныне, глас 6, самогласен: Днесь сад: Таже, Свете тихий: Прокимен дне. И Сподоби Господи: На стиховне стихиры, глас 2. Подобен: Доме евфрафов: С припевы их: Водою боготворною: Припевы: 1–й, Возносите Господа бога нашего: 2–й, Бог же царь наш прежде века: Слава, и ныне, глас 6, самогласен: Днесь древо явися: Ныне отпущаеши: Трисвятое, и по Отче наш: Тропарь праздника, глас 1: спаси Господи люди твоя и благослови достояние твое, победы благоверному императору нашему, николаю александровичу, на сопротивныя даруя, и твое сохраняя крестом твоим жительство.

ектениа малая: И отпуст. входит екклисиарх со иереем и диаконом и параекклисиархом в жертвенник, со свещами, и облачится иерей и диакон: и кадив честный крест, глаголет: благослови владыко. иерей: благословен Бог наш: Таже, Трисвятое: и по Отче наш, тропарь креста: спаси Господи люди твоя: Слава и ныне: Кондак, глас 4: Вознесыйся на крест волею, тезоименитому твоему новому жительству, щедроты твоя даруй Христе Боже: возвесели силою твоею благовернаго императора нашего, николая александровича, победы дая ему на супостаты, пособие имущу твое оружие мира, непобедимую победу.

И взимает иерей честный крест со блюдом на главу, и вносит его во святый олтарь, предыдущим же пред ним со двема лампадама: И полагает честный крест на святой трапезе на евангельском месте: а евангелие поставляет на горнее место, и вжигают пред ним свещу на всю нощь.

[Смотри] Подобает ведати: яко аще случится праздник сей в неделю, ничтоже поется воскресно: ни стихиры воскресны, ниже непорочны, ни степенна гласа, ни евангелие воскресное чтется: Точию, воскресение христово, глаголем: и свят Господь бог: не поется же, но всю службу поем праздника. На Велицей Вечерни: Аще в субботу вечера поем, блажен муж, кафисму всю. Аще же в неделю вечера, поем, блажен муж, 1–й антифон. Аще же ин день, стихологиа не бывает: но по обычном псалме поем, Господи воззвах, на глас 6. И поем стихиры праздника, на 8, глас 6. Подобен: Всю отложивше: крест воздвизаемь: Слава, и ныне, глас 2: Приидите вси языцы: Таже вход. Прокимен дне, [Аще случится праздник сей в субботу, в пяток вечера, прокимен дне оставляется: и поется прокимен великий, глас 6: Бог наш на небеси и на земли: понеже в субботу вечера поется прокимен, Господь воцарися:] Чтения 3: 1–е Исхода. Поят моисей сыны израилевы: 2–е, Притчей: Сыне не пренебрегай: 3–е, пророчества исаиина: Сия глаголет господь: отверзутся врата: И посем ектениа: Рцем вси: и Сподоби Господи: и Исполним вечернюю молитву: На литии стихиры самогласны, глас 1: Днесь яко воистинну: Слава, и ныне, глас 4: честнаго креста Христе: И обычныя молитвы бдения. На стиховне стихиры праздника, глас 5. Самоподобен: Радуйся живоносный кресте: с припевы их, писаны на малей вечерни. Слава, и ныне, глас 8. егоже древле моисей: Таже, Ныне отпущаеши: и трисвятое. По Отче наш, тропарь креста, глас 1: спаси Господи люди твоя: трижды, писан на малей вечерни. И обычное благословение хлебов, и раздаяние их: и Буди имя господне, трижды с пением. и псалом 33: благословлю Господа: И чтем слово о честном древе. На Утрени, на Бог господь, тропарь праздника трижды: И обычныя кафисмы. По кафисмах седальны, и чтения праздника. По чтении же даются свещи братии. Таже полиелей: И седален праздника: И чтение праздника. Степенна, 1 и антифон 4–го гласа. Прокимен, глас 4: Видеша вси концы земли спасение бога нашего. Стих: Воспойте господеви песнь нову. Всякое дыхание: Стих: Хвалите бога во святых его. евангелие Иоанна, зачало 42 от полу: Рече господь: отче, прослави имя твое: Таже воскресение христово: и псалом 50. Слава, молитвами апостолов: И ныне, молитвами Богородицы: Посем стихира, глас 6: кресте христов: И молитва, спаси, Боже, люди твоя: и Господи помилуй, 12. Таже иерей: милостию и щедротами: Канон, глас 8: творение кир космы. ирмос, крест начертав: по дважды. Тропари на 12: И последи ирмос, оба лика вкупе: крест начертав: По 3–й песни седален креста, глас 4: В тебе треблаженне: Слава, и ныне, тойже. И чтение праздника. По 6–й песни, кондак креста, глас 4: Вознесыйся на крест волею: писан после малыя вечерни. И икос: И чтем пролог. На 9–й песни вжигают паки свещи братия. честнейшую не поем, но поем припев праздника: Величай душе моя: Таже ирмос 1–го канона: Таин еси Богородице: И другий лик подобне припев, и ирмос: и к прочим стихам тойже припев поем. Таже поем и вторый припев: Величай душе моя: И ирмос: Снедию древа: И другий лик, подобне припев, и ирмос. Тропари обою канонов на 12. Катавасиа: Таин еси Богородице рай: Посем другий, Снедию древа: с припевом. И поклон: По 9–й песни светилен праздника, подобен: учеником: крест хранитель: дважды. Слава и ныне, подобен: Жены услышите: крест воздвизается: На хвалитех стихиры, на 4, глас 8, самоподобен: о преславнаго чудесе! Слава, и ныне, глас 6, самогласен: Днесь происходит крест господень: Таже, Славословие великое. Поему же великому славословию, облачится настоятель во всю священную одежду, и приемлет кадильницу с фимиамом, и приходит ко святей трапезе, и кадит честный крест крестообразно, и взимает его на главу, и исходит северными дверьми, предыдущим ему со двема лампадами даже до царских врат, и тамо став ожидает конца славословия и трисвятаго. Сему же скончану, возглашает настоятель велегласно: Премудрость, прости. Мы же начинаем тропарь: спаси Господи люди твоя: трижды. И приходит настоятель, нося на главе честный крест до среды церкве пред святыя царския двери: тамо убо уготовану аналогию, полагает верху его честный крест, и кадит крестообразно. Таже творит поклоны три до земли, в койлибо буди день, и взем честный крест со благовонными васильками, на подножии креста обложенными, станет пред аналогием зря к востоком. И диакон возглашает велегласно во услышание всех: Помилуй нас, Боже, по велицей милости твоей, молимся тебе, услыши нас, Господи, и помилуй, рцем вси. И начинаем первую сотницу, Господи помилуй, 50: знаменающу настоятелю в начале честным крестом, трижды. Таже преклоняет главу, елико пядию отстояти главе от земли, и помалу воздвизается горе даже до скончания втораго, 50, Господи помилуй. егда же доспеет до 90з, Господи помилуй, возвышает глас свой екклисиарх, настоятель же прямо стоя, и конца сотницы ожидая, знаменует крестом паки трижды. Таже обращается к западней стране. И глаголет диакон: еще молимся о благочестивейшем, самодержавнейшем, великом господре нашем, императоре николае александровиче всея россии, о державе, победе, пребывании, мире, здравии, спасении его и господу Богу нашему наипаче поспешити и пособити ему во всем, и покорити под нозе его всякаго врага и супостата. еще молимся о супруге его, благочестивейшей господрне, императрице александре феодоровне. еще молимся о матери его, благочестивейшей господрне, императрице марии феодоровне. еще молимся о наследнике его, благоверном господре, цесаревиче и великом князе алексии николаевиче, и о всем царствующем доме, рцем вси. И начинаем вторую сотницу, Господи помилуй. И творит настоятель второе воздвижение, якоже преднаписася. Таже обращается к полуденной стране. И глаголет диакон: еще молимся о оставлении грехов святейшаго правительствующаго синода, и всего о Христе братства нашего, о здравии и о спасении, рцем вси. И начинаем третию сотницу, Господи помилуй. Скончаваемей же той, обращается настоятель к северной стране. И глаголет диакон: еще молимся о всякой души христианстей, скорбящей же и озлобленней, здравия, спасения, и оставления грехов требующей, рцем вси. И бывает 4 воздвижение: И обращается настоятель к востоком. И глаголет диакон: еще молимся о всех служащих и послуживших во святей обители сей [или храме семъ], отец и братий наших, о здравии и о спасении, и оставлении грехов их, рцем вси. И начинаем пятую сотницу. По пятом же воздвижении, поем: Слава, и ныне, кондак: Вознесыйся на крест волею: Поему же сему, полагает настоятель честное древо креста на аналогии, и поет тропарь сей во глас 6: кресту твоему покланяемся владыко, и святое воскресение твое славим. трижды. Поющим же и братиям тойже тропарь начинает кланятися настоятель, и творит метания два пред честным крестом, таже целует его. По целовании же творит паки едино метание, такожде и на оба лика но единому метанию. Посем приходят братия вся от десныя и левыя страны два два, по чину покланяются, и целуют честный крест. Поем же и стихиры самогласны, дондеже совершится целование. Стихиры креста, глас 2: Приидите вернии: Глас 5: Приидите людие, преславное чудо видяще: Глас тойже, Глас пророк твоих: Глас 6, Четвероконечный мир: пророков гласи: Глас 8, Глас пророка твоего моисеа, Боже: Днесь владыка твари: Слава, и ныне: Днесь неприкосновенный существом: И по скончании целования честнаго креста, поставляется аналогий, с честным крестом, о десную страну царских дверей, и тамо стоит, дондеже праздник отдастся. [Смотри] Аще ли же не в соборных храмех, и воздвижение креста не бывает, точию поклонение кресту, якоже указано в неделю 3–ю святых постов. Посем входит иерей во святый олтарь, и диакон глаголет ектению: Помилуй нас Боже: иерей возглас: яко милостив и человеколюбец: Таже диакон: Исполним утреннюю молитву нашу: иерей же возглас: Твое бо есть, еже миловати: По амине, Премудрость. Лик: благослови. иерей, Сый благословен: Лик, утверди Боже: иерей, Пресвятая Богородице: Клирицы, честнейшую: И отпуст. И час 1–й. На 1–м часе тропарь праздника. По Отче наш: кондак праздника же: И совершенный отпуст.